បឹងយក្សឡោម

បឹងយក្សឡោម

បើយើងចេះរៀបចំធ្វើបរិវេណបឹងនោះឲ្យទៅជាកន្លែងលក់ត្រឹមវត្ថុអនុស្សាវរីយ៍ក៍ល្អដែរ។ ប៉ុន្តែអត់ អ៊ីចឹងទេ​ លក់ទំនិញហូបចុកទៅវិញ។ តើលោកអ្នកដឹងទេថាការលក់របស់ទាំងនោះវាមានផលមិន​ល្អ​យ៉ាងណា?

មនុស្សនៅកន្លែងណា ភាពកខ្វក់កើតមានត្រង់កន្លែងនោះ។ ការនេះមកពីយើងមិនចេះថែរក្សានូវអនាម័យ។ បើមនុស្សចេះរៀបចំដាក់ទុកវត្ថុសំណល់ វាមិនមានភាពស្មោគគ្រោកនោះឡើយ។ សូមឲ្យអ្នកមានសុខភាពល្អ ដោយ​ការរស់នៅស្អាត និងមានអនាម័យ ( ព្រះសម្មាសម្ពុទ្ធសម្តែង)។ 

តំបន់ទេសចរណ៍នោះ បើតាមអង្កេត វាអាចទាញយកផលប្រយោជន៍បានច្រើន។ ទីមួយ សាងសង់ភូមិជនជាតិដើមភាគតិចឲ្យបានកាន់តែច្រើន និងថ្មីជាដរាប។ ទីពីរ អនុញ្ញាតឲ្យត្រឹមតែអ្នកលក់វត្ថុអនុស្សាវរ៍ប្របមាត់បឹងបានហើយ។ ទីបី ចាត់តាំងឲ្យមានអ្នកប្រកបរបរតាក់តែងភ្ញៀវបានស្លៀកពាក់សម្លៀកបំពាក់ជនជាតិដើមភាគតិច ដើម្បីថតរូបអនុស្សាវរីយ៍ ឬសម្លៀកបំពាក់បុរាណខ្មែរ។ល។

ក្រៅពីនេះយើងអាចឲ្យជនជាតិភាគតិចផ្ទាល់មកលក់ផលិតផលរបស់គាត់ផ្ទាល់។ ដូចជាអនុផលព្រៃឈើ វត្ថុដែលមិនមានភាពស្មោកគ្រោក ប៉ុន្តែសំណូមពរគាត់ឲ្យស្លៀកពាក់ប្រពៃណីគាត់នៅថ្ងៃមានភ្ញៀវមកច្រើនៗ​ ដូចជាថ្ងៃបុណ្យ ថ្ងៃដែលមានមនុស្សច្រើន។

រាល់បញ្ហា សុទ្ធតែមានដំណោះស្រាយ។​ បើពិនិត្យលើហេតុនិងផលទៀត រឹតតែផ្តល់ផលដល់យើងគ្រប់គ្នា មិនថាអ្នករស់នៅទីនោះ ឬទៅលេងឡើយ ដូចជាទីតាំងចតរថយន្តដែលមានកំណើនឥតឈប់។

កិច្ចការពារ៖ ការយកចិត្តទុកដាក់ភ្ញៀវ ជាប្រភពកម្រៃដែលប្រកបដោយសមានចិត្ត ហើយដែលមនុស្សភាគច្រើនមិនប្រកែកឡើយ។

មគ្គុទេសទេសចរ៖ ណែនាំអ្នកទេសចរឲ្យបានដឹង បានយល់ ដោយរៀបចំជាក្រុមស្ម័គ្រចិត្តពន្យល់ដែលមានថ្វីមាត់ មានសេចក្តីក្លាហាន រួសរាយ​ រាក់ទាក់ ទន់ភ្លន់ យល់សភាពការ។ 

សូមជម្រាបថាមនុស្ស (ភ្ញៀវ) គ្រប់មជ្ឍដ្ឋានដែលទៅទស្សនា មិនបានដឹងពីជម្រៅ អត្ថន័យ អត្ថរស នៃទីតាំងនិងប្រវត្តិរបស់ បឹងយក្សឡោម ឬតំបន់ (ខេត្តរតនគីរី)​ ស៊ីជម្រៅនោះឡើយ។ ទឹកចិត្តពួកគេតែងតែទន្ទឹងចាំស្តាប់សំដីនៃជនរស់នៅទីនោះផ្ទាល់ជានិច្ច។ ការរៀបចំឲ្យមានបន្ទប់តូចដែល មានគ្នាអង្គុយបានប្រមាណ២០នាក់ រួចដាក់បញ្ចាំងភាពយន្ត ឬបទបង្ហាញជាអក្សរ ដែលក្នុងន័យ ណែនាំពីប្រវត្តិភូមិសាស្រ្ដ មានរយៈពេល១៥នាទី ឥតឈប់ឈរ ក៍ជាចំណុចទាក់ទាញឲ្យទេសចរម្នាក់ចំណាយលុយ១,០០០រៀលចូលស្តាប់ដែរ។

យើងអាចរៀបចំឲ្យមានរោងដោលបុរាណ ឬផ្ទះធំជនជាតិភាគតិច ក្នុងបរិវេណមាត់បឹងសម្តែង សិល្បះ របាំ តន្រ្តី របស់ជនជាតិភាគតិចគ្រប់ជនជាតិដែលមាននៅក្នុងខេត្ត។ យ៉ាងហោចរៀបចំឲ្យបានសម្តែង ក្នុងអំឡុងពេលមានភ្ញៀវច្រើន មានបុណ្យទាន ឬការណាត់ទេសចរណ៍មកច្រើនៗ។

មនុស្សដែលមានថ្វីមាត់ផ្សេងទៀត រៀបរាប់ពីប្រវត្តិជនជាតិនីមួយៗ សម្ភារប្រើប្រាស់ មុខរបរ និងទំនៀមទម្លាប់ របស់ជនជាតិដើមភាគតិចក្នុងខេត្តរតនគីរី ដោយអ្នកពន្យល់អស្ចារ្យ និងមានអ្នកនាំភ្ញៀវចេញទៅមើលភាពជាក់ស្តែង នៃកន្លែងទាំងប៉ុន្មាននេះ។