ការនាំមនុស្សចូលផ្ទះ

ការនាំមនុស្សចូលផ្ទះ

កាលពីខ្ញុំនៅពីក្មេងរស់នៅតែជាមួយជីដូនភាគច្រើនលើសលុប។ ខ្ញុំហៅជីដូនថាម៉ាក់យាយ ព្រោះគាត់ជាម្តាយម្នាក់ផងដែរ។ ឆ្លងកាត់ការអប់រំណែនាំខ្ញុំបានចងចាំនូវពាក្យប្រដៅរបស់គាត់​ពេលនេះនាំមកជូនមិត្តជ្រាបដូចតទៅ៖

បើកាលណាយើងទៅគប់មិត្តយ៉ាងណារមែងបានផលតាមនោះដែរ។ ចុះបើយើងបែរជាចង់ជ្រើស​យកនរណាមួយមកចូលក្នុងជីវិតវិញនោះ តើគួរពិចារណារដូម្តេច?​ ការសេពគប់សំខាន់បំផុតក្នុង​ការប្រព្រឹត្តទៅក្នុងការរស់នៅរបស់មនុស្សគ្រប់រូបនៅលើលោកនេះ។ សូមឲ្យប្អូនយុវជន​ទាំងអស់​មេត្តាគិតឲ្យបានគត់មត់ក្នុងការរាប់អានគ្នា។

នៅពេលរាប់អានបានជាមិត្តជិតស្និទ្ធហើយសឹមចាប់ផ្តើមនាំគេចូលមកក្នុងផ្ទះ។ និយាយឲ្យចំ​សូម​នាំគេចូលមកដល់​ផ្ទះកុំបី​ខានឡើយ​​ សូមកុំខ្លាច ស្ថានភាពពិតនឹងបង្ហាញឲ្យយើងបានដឹងនៅពេល​គាត់ចូលមកដល់លំនៅរបស់យើង។ មិត្តល្អគេមិន​ខ្លាច​ផ្ទះរបស់​យើងទេ ហើយបើមិត្តនោះល្អមែន​អ្នកក៍មិនខ្លាច​នឹងនាំគេមកលេងផ្ទះគេវិញដែរ។

ការប្រព្រឹត្តទៅរបស់ការចេញចូលក្នុងផ្ទះអាចធ្វើការសន្និដ្ឋានបានហើយ រួចបើយើង​ប្រហែស​និងថ្លោះធ្លោយវិញនោះវាជាការទទួលខុសត្រូវរបស់អ្នកហើយ កុំបន្ទោសនរណាឡើយ។

និយាយដូចជាច្រុំដែល ការនាំមនុស្សចូលផ្ទះទាក់ទិននឹងការឆ្លាតវៃរបស់យើង​ បានសេចក្តីថាទម្រាំនឹងយើងសម្រេចចិត្តនាំគេមកលេងផ្ទះពិតណាស់ជាបានពិនិត្យមួយ​អន្លើរដែរហើយ ដល់ចង់ឲ្យបងប្អូនម៉ែឪជីដូនជីតាមាមីងពិនិត្យបានកាន់តែច្បាស់ទើបបង្ហាញ។ មានគ្រួសារតិចណាស់ដែលមិនប្រកាន់វណ្ណៈ ការប្រកាន់នាំមកនូវការលំបាកម្យ៉ាង តែការប្រព្រឹត្តជាការវិនិច្ឆ័យក្នុងការទទួលយក។

សូមអ្នកនាំមនុស្សចូលក្នុងផ្ទះបានល្អ បានសមដូចបំណង។

សូមគិតរួចសឹមគូរ។

សូមអរគុណ។